Poetic Tribute on sad demise of Maulana Ziauddin Islahi ,Editor "Muaarif" and Director Darul Musannifeen , Shibli Academy, Azamgarh

The Ziauddin Islahi adeeb e khush bayan
Ek sadak ke haadse mein chal base jo nagahan
The woh Shibli ki Rawayat ke haqiqi pasban
Hai "Muaarif" aaj jinke fikr o fan ka tarjuman
Unka faizan e nazar tha ek ganj e shaigan
Ja baja bikhre hue hain unki azmat ke nishan
Gulshan e Shibli mein unki zaat thi misl e bahar
Unke jane se yahan par aagayee fasl e khizan
Unki amali zindagi thi mazhar e sidq o safa
Unki ilmi shakhsiyat thi marja e dinishwaran
Unki Islami adab par thi bahut gahri nazar
Unke rashhat e qalam hain mazhar e husn e bayan
Unka hai Urdu Adab par ek ehsaan e azeem
Mit nahin sakte kabhi unke nuqush e javedan
Wah sharifunnafs the sab ko hai iska eteraaf
Apne husn e khulq se the woh dilon par hukmaran
Unki qabl az waqt rehlat se sabhi hain sogawar
Ho nahin sakti talafi jiski hai yeh woh ziyan
Unke rufqa sadmah e jankaah se hain muzmahil
The woh "Barqi" andalib e gulshan e Hindustan
Jald hi Haj ki saadat se hue the sarfaraz
Unka maskan aaj hai "Ahmad Ali" baagh e jinan

Dr. Ahmad Ali Barqi Azmi
598/9 (L-27) Zakir Nagar
New Delhi-110025